અમદાવાદના દલપતકાકાનું નિધન થતા 60 કૂતરા અનાથ બની ગયા, કેટલાક કૂતરાઓએ છોડી દીધું ભોજન

નવરંગપુરા વિસ્તારમાં રોડ પર રહેતા 60થી વધુ કૂતરાની સાર-સંભાળ 75 વર્ષીય દલપત ઠક્કર રાખતા હતા. તેઓ સવારમાં ઉઠતા જ તપાસ કરતા કે તેમના આ બાળકોને કોઈ તકલીફ તો નથી અને તેમણે બરાબર ખાધું છે કે નહીં! ગત શનિવારે બીમારીને કારણે દલપત ઠક્કરનું નિધન થતા તેમના 60 બાળકો અચાનક જ અનાથ બની ગયા છે.

વીમા વ્યવસાય સાથે સંકળાયેલા અને છેલ્લા બે વર્ષથી દલપતભાઈને આ કામમાં મદદ કરતા હિમાંશુએ જણાવ્યું છે કે, ‘કેટલાક કૂતરાઓ છેલ્લા બે દિવસથી ફૂડને અડક્યા નથી, તો કેટલાકે હજુ સુધી કંઈ ખાધુ નથી. આ બધા સાથે દલપતકાકા ખૂબ જ જોડાયેલા હતા.’

તેમણે વધુમાં જણાવ્યું છે કે ‘ દલપતભાઈ ખૂબ જ સંભાળ રાખતા. તેમણે ક્યારેય લગ્ન ન કર્યા કારણ કે તેમને ખાતરી નહોતી કે તેમના જીવનસાથી કૂતરાઓ સાથેની લાગણી સમજી શકશે. જ્યારે કોઈ કૂતરી બચ્ચાને જન્મ આપવાની હોય ત્યારે તેઓ તેની ખાસ સંભાળ રાખતા અને બચ્ચાના જન્મ બાદ તેને પણ એટલો જ પ્રેમ આપતા. મને યાદ છે કે આંધળી કૂતરી હતી જે યોગ્ય રીતે ખાઈ શકતી નહોતી. દલપત કાકા તેને ખવડાવવા માટે ખાસ જ્યાં સુધી તે ખાવાનું પૂર્ણ ન કરે ત્યાં સુધી બાઉલ પકડીને ઊભા રહેતા હતા. દુર્ભાગ્યપૂર્ણ બે મહિના પહેલા જ તે કૂતરીનું પણ મોત થઈ ગયું હતું.’

એક જૂની કહેવત છે ને જ્યાં ઈચ્છા હોય ત્યાં રસ્તો આપોઆપ મળી જાય. દલપતભાઈ માટે પણ આ જીવનનો એક માર્ગ હતો. પોતાને ભોજન મળે કે ન મળે પરંતુ તેઓ ખાતરી કરતા કે તેમના કૂતરાને રોજે રોજ ખાવાનું મળી રહે. શરૂઆતમાં આજુબાજુના લોકો તેમની આ કામગીરી સામે વિરોધ હતો પરંતુ સમય જતા તેમણે પણ દલપતભાઈને મદદ કરવાનું શરૂ કર્યું. તેઓ ફૂડ અને અન્ય જરૂરિયાત વસ્તુઓની મદદ કરતા હતા.

નવરંપુરામાં રહેતા હિરલ મહેતા જણાવે છે કે, ‘લગ્ન થયા બાદ છેલ્લા બે વર્ષથી હું આ વિસ્તારમાં રહું છું. મને જ્યારે દલપતભાઈના આ કામ વિષે ખબર પડી તો હું પણ તેમની સાથે આ કૂતરાઓને સવાર સાંજ ખવડાવવામાં મદદ કરતી હતી. હવે જ્યારે તેઓ નથી હવે હું કૂતરાઓને દૂધ અને બિસ્કિટ પહોંચાડીશ.’ દલપતભાઈના 60 કૂતરાંઓની સારસંભાળ માટે તેમની સાથે 25થી વધુ વૉલન્ટીયર્સ જોડાયા હતા. હવે તેઓ આ તમામ કૂતરાઓની સારસંભાળ રાખશે