માતા-પિતા માટે ચેતવણીરૂપ ઘટના: સુરતમાં ઉત્તરાયણ પહેલાં પતંગ ચગાવતું 6 વર્ષનું બાળક પાંચમા માળેથી નીચે પટકાયું, પરિવારે એકનો એક દીકરો ગુમાવ્યો

ઉત્તરાયણને હવે ગણતરીના દિવસો બાકી રહ્યા છે. ત્યારે દરેક માતા-પિતા તથા પતંગરસિકો માટે લાલબત્તી ધરતો બનાવ સામે આવ્યો છે. સુરતના અડાજણ-પાલ રોડ પર એક માસૂમ બાળક પાંચમા માળની અગાસી ઉપરથી પતંગ ચગાવતાં બહેન અને બાળમિત્રોની નજર સામે નીચે પટકાતાં મોતને ભેટ્યું છે. એગ્રિકલચર કોલેજમાં મદદનીશ પ્રાધ્યાપકના એકના એક દીકરા સાથે ઉત્તરાણ પહેલાં થયેલી દુર્ઘટના એ માતા-પિતાઓ માટે જાગ્રત રહેવાનો સંદેશો આપી રહી છે. પીડિત પિતાએ કહ્યું હતું કે કાલે પહેલી જ વાર પતંગ આપ્યા ને છ વર્ષના માસૂમ તનયના જીવનની દોર તૂટી ગઈ, પત્ની તો હજી અજાણ છે. લાડકા દીકરાના મૃતદેહને જોઈ તેના પર શું વીતશે એ ખબર નથી..

હિરેનભાઈ પટેલ (પીડિત પિતા)એ જણાવ્યું હતું કે તનય ધોરણ-1માં અભ્યાસ કરતો હતો. રોજ નીલકંઠ એવન્યુના બાળમિત્રો સાથે ધાબા પર રમવા જતો હતો. તેની મોટી બહેન એની સાથે જ રહેતી હતી. ગુરુવારની સાંજે તનયે પતંગ ચગાવવાની જીદ કરતાં માતાએ પતંગ લાવી આપ્યો હતો. બહેન અને બીજા બાળમિત્રો સાથે જ હતા. તનય પટકાતાં અચાનક બૂમાબૂમ અને ચિચિયારીઓ પડતાં લોકો ભેગા થઈ ગયા હતા.

પત્નીએ દોડીને જોયું તો તનય અગાસી પરથી એટલે કે લગભગ 60-70 ફૂટ ઉપરથી નીચે પટકાયો હતો. માથા અને છાતીમાં ગંભીર ઇજાઓ થઈ હતી. તાત્કાલિક દોડીને નજીકની ખાનગી હોસ્પિટલમાં લઈ જતાં મૃત જાહેર કરાયો હતો. પત્નીને તો એમ જ છે કે તનય હોસ્પિટલમાં દાખલ છે અને સાજો છે, મારું મન જ જાણે છે. હું આખી રાત દીકરાના મૃતદેહ સાથે કેમ રહ્યો છું, એમ મૃતકના પિતાએ કહ્યું હતું.

હિરેનભાઈએ વધુમાં કહ્યું હતું કે હું પોતે મદદનીશ પ્રાધ્યાપક છું. એગ્રિકલ્ચર કોલેજ ઘોડદોડ રોડ, સુરતમાં. બસ પોસ્ટમોર્ટમ થાય પછી દીકરાના મૃતદેહને ઘરે લઈ જઈશું, પણ તેની માતાને કેવી રીતે અને કેમ શાંત રાખવી એ ખબર નથી પડતી. તે તો દીકરાને મળવાની જીદ પકડીને બેઠી છે. હાલ અડાજણ પોલીસ આગળની કાર્યવાહી કરી રહી છે.

ઉત્તરાયણના તહેવારોમાં શું ના કરવું જોઈએ?

– ઈલેક્ટ્રીક વાયરમાં ફસાયેલ પતંગ કે દોરી કાઢવા પ્રયત્ન કરવો નહીં.
– કોઇએ પણ ઉંચાઈએથી જમીન પર કૂદવું જોઈએ નહીં.
– ઈલેકટ્રીક વાયર, રોડ અને વીજળીના થાંભલાની નજીક પતંગ ચગાવવો નહીં.
– લીસી, ખરબચડી, તૂટેલી અને નબળી અગાસી પર ઉભું રહેવું નહી.
– નબળા બાંધકામ કે છાપરા પર પતંગ ચગાવવા નહી.
– જાહેર રસ્તા પર પતંગ પકડવા દોડવું ન જોઈએ.

ઉત્તરાયણ પહેલા અને ઉત્તરાયણના દિવસે શું સાવચેતી રાખવી?

– પતંગ ચગાવતા પહેલાં આંગળીઓને મેડીકેટેડ ટેપ લગાવી જોઈએ.
– બાળકોએ વાલીની દેખરેખ હેઠળ પતંગો ચગાવવો જોઈએ.
– વાહન ચાલકે હેલ્મેટ અવશ્ય પહેરવું જોઈએ.
– બાઇક પર આગળ સેફ્ટી સળીયો લગાવવો.
– ઈજા થાય તો 108 નંબર ડાયલ કરવો.
– અગાસીમાં ફર્સ્ટ એઈડ કીટ અવશ્ય રાખવી.

લેટેસ્ટ ન્યૂઝ તમારા ફોન પર સૌથી પહેલા મેળવવા માટે અમારા ફેસબુક પેજને લાઈક કરો

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ PNN- News Network ની એપ્લિકેશન ડાઉનલોડ કરો. જય હિન્દ.. જય ભારત..

તમે અમને Twitter અને Telegram પર લાઇક અને ફોલો કરી શકો છો.

If you like our post than don’t forget to share with your friends..