વિસનગરનો કાળજુ કંપાવનારો કિસ્સો! સાસરીયાઓએ હેવાનિયતની હદ વટાવી, પરીણિતા ગર્ભવતી હોવા છતાં ઢોર માર મારતા ગર્ભપાત થયો

વિસનગર- મહિલાઓ પર થતા અત્યાચાર અને ખાસ કરીને ઘરેલુ હિંસાને રોકવા માટે ઘણાં પ્રયત્નો કરવામાં આવી રહ્યા છે, પરંતુ દુર્ભાગ્યવશ આજે પણ સમાજમાં આ દૂષણ મોટા પ્રમાણમાં હાજર છે. મહિલા સશક્તિકરણની વાતો ચારેબાજુ થઈ રહી છે, પરંતુ આજે પણ મોટી સંખ્યામાં એવી મહિલાઓ છે, જેમણે લગ્ન પછી દહેજની માંગણી અથવા અન્ય કારણોસર સાસરીયાઓના ત્રાસનો સામનો કરવો પડી રહ્યો છે. વિસનગરમાં રહેતી એક મહિલા આ જ પ્રકારના અત્યાચારનો શિકાર બની છે. તેણે આખરે પોલીસ સ્ટેશનમાં ફરિયાદ નોંધાવી છે.

વિસનગર તાલુકાના બેચરપુરા ગામમાં રહેતા રમણભાઈ મગનભાઈ સેનમાની દીકરી હેતલબેન સેનમાના લગ્ન વિસનગર કાંસા એન.એ.વિસ્તારમાં આવેલી વિજયનગર સોસાયટીમાં રહેતા રવિ પુંજાભાઈ સાથે થયા હતા. હેતલબેનના લગ્ન ઉલ્લાસપૂર્વક કરવામાં આવ્યા હતા અને માતા-પિતાએ દીકરીને ખુશહાલ જીવનના આશિર્વાદ સાથે વળાવી હતી. પરંતુ દુર્ભાગ્યવશ હેતલબેનના સાસરીયાઓએ તેની સાથે જે વર્તન કર્યું તે સાંભળીને કોઈનું પણ કાળજુ કાંપી જાય.

લગ્નના લગભગ 3 મહિના પછી જ હેતલબેનના પતિ, સાસુ અને બે નણંદોએ રાક્ષસી સ્વરુપ ધારણ કરવાની શરુઆત કરી દીધી હતી. જ્યારે પરીણિતા ત્રાસથી કંટાળીને પિયર જવાની વાત કરતી તો તેનો પતિ ઝેર પીને મરી જવાની ધમકી આપતો હતો. આ દરમિયાન પરીણિતા ગર્ભવતી બની હતી. હેતલબેનના પતિને આ વાતની જાણ હોવા છતાં તેના પર મારઝુડ કરતો હતો. આખરે કંટાળીને તે બેચરપુરા પોતાના પિયરમાં જતી રહી હતી.

ફરિયાદ અનુસાર, લગભગ બે મહિના પછી સાસરીપક્ષના લોકો હેતલબેનને બોલાવવા આવ્યા અને પોતાની સાથે લઈ ગયા. હેતલબેનના પિતા દીકરી માટે ખાણીપીણીની વસ્તુઓ લઈને આવતા તેમની સાથે પણ સાસરીયાઓએ લડાઈ કરી હતી. પિતાના જતા રહ્યા પછી પતિ, સાસુ અને બે નણંદોએ મળીને તેની સાથે મોટી લડાઈ કરી હતી. ગુસ્સામાં ભાન ભુલેલા પતિએ વાળ પકડીને પરીણિતાને ઓટલા ઉપર પછાડતા તેને રક્તપાત શરુ થઈ ગયો હતો. આવી સ્થિતિ જોઈને પણ કોઈને તેના પર દયા ન આવી અને તેને સારવાર માટે દવાખાને પણ નહોતા લઈ ગયા.

ફરિયાદી હેતલે પિયરમાં આ બાબતે જાણ કરી અને ખાનગી હોસ્પિટલમાં સારવાર માટે દાખલ કરવામાં આવી. ત્યારપછી પરિણીતાને વિસનગરની સિવિલ હોસ્પિટલ મોકલવાની તબીબોએ સલાહ આપી હતી. જ્યાં તબીબોએ ગર્ભપાત થયો હોવાની જાણકારી આપી હતી. હેતલબેને પોલીસ સ્ટેશનમાં પતિ રવિ સેનમા, નણંદ સોનલબેન સેનમા અને રૂપલબેન સેનમા તેમજ સાસુ પુષ્પાબેન સેનમા વિરુદ્ધ ફરિયાદ નોંધાવી હતી.

લેટેસ્ટ ન્યૂઝ તમારા ફોન પર સૌથી પહેલા મેળવવા માટે અમારા ફેસબુક પેજને લાઈક કરો

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ PNN- News Network ની એપ્લિકેશન ડાઉનલોડ કરો. જય હિન્દ.. જય ભારત..

તમે અમને Twitter અને Telegram પર લાઇક અને ફોલો કરી શકો છો.

If you like our post than don’t forget to share with your friends..