સેવા પરમો ધર્મના સુત્રને સાર્થક કરતા આ ભારતીય ડોક્ટર યુક્રેનમાં ફસાયેલા વિદ્યાર્થીઓની મદદ કરવા માટે જીવના જોખમે કીવમાં રોકાઈ ગયા

ભારત સરકાર દ્વારા યુક્રેનમાં ફસાયેલા વિદ્યાર્થીઓને પાછા લાવવા માટે કવાયત હાથ ધરવામાં આવી રહી છે. વિદ્યાર્થીઓ કોઈ પણ રીતે સરહદ સુધી પહોંચવા મથી રહ્યા છે. આ સ્થિતિમાં મૂળ કલકત્તાના ડોક્ટર પૃથ્વી રાજ ઘોષ જીવના જોખમે કીવમાં રહીને લોકોને મદદ કરી રહ્યા છે. ભારતીય વિદ્યાર્થીઓને બોર્ડર સુધી પહોંચાડવા માટે ડોક્ટર ઘોષ દિવસ રાત એક કરી રહ્યા છે.

કલકત્તા- રશિયા અને યુક્રેન વચ્ચે ચાલી રહેલા યુદ્ધની ચર્ચા દુનિયાભરમાં થઈ રહી છે. ભારત સરકાર દ્વારા પણ યુક્રેનમાં ફસાયેલા ભારતીયોને સુરક્ષિત પાછા લાવવા માટે કવાયત હાથ ધરવામાં આવી રહી છે. વિદ્યાર્થીઓ પણ જીવ બચાવવા માટે કોઈ પણ રીતે યુક્રેન પાસેની આંતર્રાષ્ટ્રીય સરહદો જેમ કે પોલેન્ડ અથવા રોમાનિયા પહોંચી રહ્યા છે. આ સ્થિતિમાં મૂળ કલકત્તાના એક 37 વર્ષીય ડોક્ટર એવા છે જેમણે યુક્રેનમાં જ રહેવાનો નિર્ણય લીધો છે. યુક્રેનના નાગરિકોની એક નાનકડી ટીમ સાથે મળીને આ ડોક્ટર સેંકડો ભારતીય અને અન્ય દેશના લોકો માટે બોર્ડર સુધી પહોંચવા માટે બસ અને કારની વ્યવસ્થા કરી રહ્યા છે. વિદ્યાર્થીઓની મદદ માટે તેઓ સતત ઈન્ડિયન એમ્બેસીના સંપર્કમાં રહે છે અને સમયસર અપડેટ મેળવતા અને આપતા રહે છે.

ઓન્કોલોજીસ્ટ પૃથ્વી રાજ ઘોષ પાછલા બે દશકથી યુક્રેનમાં રહે છે. અત્યારે તેઓ યુક્રેનની રાજધાની કીવમાં છે અને આશરે તેમણે 50 જેટલા બંગાળના નાગરિકો અને 350થી વધારે વિદ્યાર્થીઓને પાછલા થોડા દિવસમાં બોર્ડર સુધી પહોંચવામાં મદદ કરી છે. પૃથ્વી રાજ ઘોષ એક સંસ્થા પણ ચલાવે છે જે વિદેશના વિદ્યાર્થીઓને યુક્રેનમાં અભ્યાસ માટે યોગ્ય યુનિવર્સિટી પસંદ કરવામાં મદદ કરે છે. કીવના વિદ્યાર્થીઓ માટે ડોક્ટર પૃથ્વી રાજ એક જાણીતા વ્યક્તિ છે.

ભારતીય એમ્બેસીએ એડવાઈઝરી જાહેર કરી હતી કે કોઈ પણ ભારતીય કીવમાં ન રહે અને વહેલીતકે કીવથી બહાર નીકળી જાય. તે સમયે ડોક્ટર પૃથ્વી રાજે અમારા સહયોગી ટાઈમ્સ ઓફ ઈન્ડિયાને જણાવ્યું કે, 2014માં થયેલા રશિયા-યુક્રેન યુદ્ધ દરમિયાન પણ હતું અહીંયા જ હતો. તે સમયે પણ પરિસ્થિતિની જાણકારી મેળવીને મેં યુદ્ધ શરુ થાય તે પહેલા જ વિદ્યાર્થીઓને યુક્રેન છોડવાની સલાહ આપી હતી. અમુક વિદ્યાર્થીઓ જતા પણ રહ્યા હતા પરંતુ પછી ફ્લાઈટની ટિકિટ મોંઘી થઈ ગઈ અને તેઓ નહોતા જઈ શક્યા. અને પછી યુદ્ધ શરુ થઈ ગયું. પરંતુ બંકરમાં છુપાયેલા વિદ્યાર્થીઓ માટે ચોખા અને દાળનો સંગ્રહ કરીને રાખ્યો હતો. મેં 20 નાની બસ અને 5 મોટી બસની વ્યવસ્થા કરાવી, જેથી વિદ્યાર્થીઓ બોર્ડર સુધી પહોંચી શકે.

ડોક્ટર પૃથ્વી રાજ આગળ જણાવે છે કે, સ્થિતિ જેમ વણસતી ગઈ તેમ યુક્રોનના બસ ડ્રાઈવર અને વાહનો મેળવવા મુશ્કેલ થઈ ગયા હતા. યુક્રેનના ડ્રાઈવરને પણ પોતાના જીવની ચિંતા હતી. કર્ફ્યુ દરમિયાન જો તેઓ બહાર ફરશે તો તેમની સામે કોઈ કાર્યવાહી પણ થઈ શકે છે. પરંતુ મેં મારી ઓળખના અમુક લોકોનો સંપર્ક કર્યો અને શક્ય હોય તેટલા વિદ્યાર્થીઓને કીવની બહાર મોકલવાનો પ્રયાસ કર્યો.

યુક્રેનમાં 4 દિવસ પાણી પીને જીવતો રહ્યો ભારતીય વિદ્યાર્થી, સુરક્ષિતરીતે વતન પરત ફર્યો
પુષ્પક નામના એક વિદ્યાર્થીના માતા જણાવે છે કે, મારો દીકરો ત્યાં ફસાઈ ગયો હતો અને શહેરની બહાર નીકળવાનો કોઈ રસ્તો નહોતો. પરંતુ ડોક્ટર ઘોષે બસની વ્યવસ્થા કરી અને મારો દીકરો તેમજ અન્ય વિદ્યાર્થીઓ સુરક્ષિત રીતે બોર્ડર સુધી પહોંચી શક્યા. તેઓ રોમાનિયા પહોંચી ગયા છે અને ભારતની ફ્લાઈટની રાહ જોઈ રહ્યા છે. ડોક્ટર ઘોષના કારણે અનેક વિદ્યાર્થીઓના માતા-પિતાને હાશકારો થયો છે. પરંતુ કલકત્તામાં ડોક્ટર ઘોષના માતા-પિતા અત્યારે ચિંતામાં મૂકાયા છે અને તેમની ઊંઘ ઉડી ગઈ છે.

તેમના પિતા પ્રદિપ ઘોષ જણાવે છે કે, મને ખબર છે કે તે ઘણું નેક કામ કરી રહ્યો છે પણ અમારુ શું? અમને પણ અમારા દીકરાની ચિંતા છે અને જે શહેરમાં અમારો દીકરો છે ત્યાંના દ્રશ્યો અમને રાત્રે સુવા નથી દેતા. હું તેને સુરક્ષિત જોવા માંગુ છું, હું ઈચ્છુ છું કે તે વહેલીતકે ઘરે પાછો આવી જાય. પરંતુ ડોક્ટર ઘોષ માટે હજી ઘણાં કામ બાકી છે. તેઓ જણાવે છે કે, અન્ય શહેરોમાં ફસાયેલા વિદ્યાર્થીઓના મને ફોન આવી રહ્યા છે. બુધવારે બપોરે મને ખારકીવ મેટ્રો સ્ટેશનમાં ફસાયેલા એક ભારતીય વિદ્યાર્થીનો ફોન આવ્યો હતો. મારે હજી અહીં કામ બાકી છે. હું મુશ્કેલીના આ સમયમાં વિદ્યાર્થીઓને એકલા મૂકીને નથી આવી શકતો.

લેટેસ્ટ ન્યૂઝ તમારા ફોન પર સૌથી પહેલા મેળવવા માટે અમારા ફેસબુક પેજને લાઈક કરો

લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ PNN- News Network ની એપ્લિકેશન ડાઉનલોડ કરો. જય હિન્દ.. જય ભારત..

તમે અમને Twitter અને Telegram પર લાઇક અને ફોલો કરી શકો છો.

If you like our post than don’t forget to share with your friends..